Бүгүн, ол эбэтэр олунньу 25 күнүгэр СӨ Бырабыыталыстыбатын 2024 сыллааҕы үлэтин отчуоттуур мунньаҕа Бөтүҥ нэһилиэгэр ыытылынна.
Мунньаҕы отчуоттуур бөлөх салайааччыта, СР экология, айылҕа харыстабылын уонна ойуур хаһаайыстыбатын миниистирин солбуйааччы Алексеев Анатолий Анатольевич салайан ыытта.
Салгыы Анатолий Алексеев былырыыҥҥы мунньахха киирбит этиилэр туолууларын сиһилии билиһиннэрдэ. Ол курдук, 15 боппуруос киирбититтэн 7-тэ тустаах министиэристибэлэргэ, 2-тэ олохтоох дьаһалтаҕа тиэрдиллибит, 7 этии быһаарыллыбыт, 3 боппуруос быһаарыыга сылдьар.
Бүгүн олохтоохтор оскуола хаарбах туруктанан, сууллар куталлааҕынан, саҥа оскуола тутуутун күүскэ туруорустулар.
Ону тэҥэ, Республика үрдүнэн хамнас олус араастаһарын, үгүс үлэһиттэр хамнастара кыратын, уу кэлиитигэр бэлэмнэнэн, сэбиэскэй кэмҥэ курдук өрүһү дириҥэтии үлэтин сайыннары ыытыы наадатын эттилэр. Россия үрдүнэн олохтоох бэйэни салайыныы саҥа федеральнай сокуона олоххо киирэрин, былаас биир ситимин олохтууру кытта сөпсөспөттөрүн биллэрдилэр. Тыа хаһаайыстыбатыгар улууска бэриллибит боломуочуйа хайдах былааннаахтык ыытыллан эрэрин сурастылар, чуолаан, үүт сыанатын үрдэтиини, толору хааччыллыылаах автоматизированнай хотоннору тутан дьон үлэлиир усулуобуйатын тэрийиини, арыы сирдэргэ өртөөһүнү көҥүллээһини туруорустулар.
Маны сэргэ асфальт суолга айан түргэнин хааччахтыыр бэлиэлэри туруорары, Бөтүҥ трассатын суолун өрөмүөннүүрү, автобус тохтуур сирдэрин оҥорууну, кустааһын болдьоҕун кылгатыыны, иннин диэки 1 нэдиэлэ сыҕарытан биэрэри, гаас, уот сыаната үүнэ-тэһиинэ суох үрдүүрүн хонтуруолга тутары эттилэр, «Хаарбах уонна сааххалланар туруктаах дьиэттэн дьону көһөрүү» программа салгыы хайдах үлэлиэҕин ыйыталастылар, Бөтүҥ дьоно-сэргэтэ быйылгы улахан халаан уутуттан чөлүгэр түһэрии үлэлэригэр Ил Дархан, Бырабыыталыстыба, Сахабыт сирин бары улуустара бииргэ түмсэн күүс-көмө буолбуттарыгар, көмө кэлэн дьиэ-уот, хаһаайыстыбалар сөргүтүллэннэр этэҥҥэ кыстыгы туораан эрэллэрин иһин барҕа махтал тылларын эттилэр. Хас биирдии киирбит ыйытыыга тустаах салайааччылар хоруйдары биэрдилэр. Бөтүҥнэр өрөспүүбүлүкэҕэ сайдыы барарын, үгүс ситиһии баарын бэлиэтээн туран, сыллааҕы үлэни биһирииллэрин биллэрдилэр.
Анатолий Алексеев мунньахха кэлэн санааларын аһаҕастык эппит Бөтүҥ олохтоохторугар махталын тиэртэ, инникитин Бөтүҥ нэһилиэгэ сайдыаҕын эрэнэрин эттэ.
Улуус баһылыгын солбуйааччыта Юрий Дьяконов эдэр ыалга Антонина Егоровна уонна Михаил Анатольевич Михайловтарга дьиэ атыылаһалларыгар, тутталларыгар анаан социальнай төлөбүр оҥоһулларын туһунан туоһу суругу үөрүүлээх быһыыга-майгыга туттарда.
Салгыы олохтоохтору кытта көрсөн биирдиилээн санааларын иһиттилэр. Мунньах кэнниттэн отчуоттуур бөлөх салайааччыта Анатолий Алексеев уонна улуус баһылыгын солбуйааччыта Юрий Дьяконов тыыл, үлэ бэтэрээннэригэр дьиэлэринэн сылдьан Кыайыы 80 сылынан юбилейнай мэтээллэри туттардылар, эҕэрдэлээтилэр.