Олунньу 22 күнүгэр, Бөтүҥ нэһилиэгэр Аҕа дойдуну көмүскээччилэр күннэригэр аналлаах, нэһилиэкпит эр хоһууннарыгар анаан тэрээһиннэр ыытылыннылар.
Ол курдук спортсаалаҕа түөлбэлэринэн военизированнай эстафета ыытылынна.
Хас биирдии түөлбэттэн 5 тии эр дьон 7 көрүҥҥэ күрэхтэстилэр, ол курдук мэһэйдээх сүүрүү, «По-пластунски» сыыллан тиийэн кронхолл, противогазтаах сүүрэн тиийэн баскетбольнай корзинаҕа мээчик быраҕыы, «Спасение раненого» медицинскай түһүмэх, миэстэттэн туран уһуну ыстаныы, «Калашников» автоматы бириэмэҕэ ыһыы-таҥыы, «Снайпер» винтовканан сыал ытыы.
Уопсай түмүккэ үһүс миэстэни «Чараҥ», иккис миэстэни «Кэскил» түөлбэ ыллылар, муҥутуур кыайыылааҕынан «Сэргэлээх» түөлбэ буолла. Бары миэстэлэспит хамаандалар уонна кыттааччылара Дипломнарынан, бириистэринэн наҕараадаланнылар.
Бу күн С. П.Оконешников аатынан «Айылгы» культура киинигэр Россияҕа Аҕа дойдуну көмүскээччи, Саха республикатыгар Ийэ дойдуну көмүскээччи, Нам улууһугар Кыайыы сылларын арыллыыта, Аҕа дойду көмүскээччилэрин күнүгэр аналлаах үөрүүлээх тэрээһин буолла.
Тэрээһин Аҕа дойду Улуу сэриитигэр олохторун толук уурбут дьоммутун-сэргэбитин кэриэстээн иһийэн турууттан саҕаланна.
Кыайыы 80 сыла арыллыбытынан бэйэлэрин эҕэрдэлэрин тиэртилэр Бөтүҥ нэһилиэгин баһылыга Макаров Михаил Васильевич, нэһилиэк бэтэрээннэрин сэбиэтин председателэ Михайлова Людмила Васильевна, сэрии сылын оҕото, үлэ бэтэрээнэ Кугданов Михаил Федорович.
Салгыы нэһилиэкпит күүстээх аҥардара нэһилиэк дьахталлара бэлэмнээбит баай -талым астаах сандалыларыгар олорон, Аҕа Дойду көмүскээччилэрин күнүнэн, эҕэрдэ нүөмэрдэри көрдүлэр, араас оонньууларга оонньоотулар.
Бары мустубут эр хоһууннарбытыгар нэһилиэк дьахталларын аатыттан бэлэхтэр туттарылыннылар. Ону тэҥэ «Күбэйэ» волонтер-иистэнньэҥнэр түмсүүлэрэ ( Салайааччы Валентина Дмитриевна Макарова) Заровняев Алексей Алексеевичка, Суздалов Анатолий Дмитриевичка, Игнатьев Альберт Кирсановичка, Румянцев Алексей Алексеевичка, Эверстов Юрий Ефремовичка, Евстафьев Григорий Васильевичка.
Тэрээһини «Хотойук» литературнай түмсүү оҕолоро (салайааччы Протопопова Т.Р), «Чөмчүк» эдэр ыччат үҥкүү ансамбла, нэһилиэк дьахталларын ансамблара, Лена Ушницкая ырыаларынан, хоһооннорунан, үҥкүүлэринэн киэргэттилэр.
Олохтоох библиотека бэлэмнээбит «Бөтүҥ нэһилиэгэ Аҕа дойду сэриитигэр» презентацията, «Нам улууһа Аҕа дойду сэриитигэр» кинигэ быыстапката көрдөрүлүннэ.
Бары мустубут эр дьоммут бэйэ бэйэлэрин кытта алтыһан, дуоһуйа сынньанан тарҕастылар. Биэчэри иилээн саҕалаан тэрийэн ыыттылар нэһилиэк дьахталларын сэбиэтэ (салайааччы Ушницкая Лена Дмитриевна)