Бөтүҥ РФ народнай артыыһа Семен Оконешников кэриэһигэр “Голоса трех долин” академическай ырыаҕа өрөспүүбүлүкэтээҕи аһаҕас куонкурус буолла. Оконешников Семен Петрович театр артыыһа, опера ырыаһыта, Суорун Омоллоон аатынан опера уонна балет үлэһитэ этэ.
Бөтүҥ нэһилиэгэр “Голоса трех долин” академическай ыллааһыҥҥа өрөспүүбүлүкэтээҕи аһаҕас куонкурус ыытылларыгар үгүс үлэ барбытын дириэктэр Михаил Макаров чопчулуур. Ол курдук, Винокурова Ирина Семеновна дириэктэрдии олорон уус-уран айымньы салайааччыта Данилова Марианна Михайловналыын Граҥҥа үлэ суруйаннар, намнар киэн туттар биир дойдулаахпыт Семен Оконешников аатынан куонкурус үрдүк таһымҥа ааста.
Туруу үлэһиттэр “Айылгы” култуура киинин салайар кэмнэригэр Граҥҥа элбэҕи үөрэтэн күүскэ ылсан суруйаннар, чочуйаннар Саха сирин “Кыһыл көмүс куолаһа” Семен Оконешников РФ, СӨ народнай артыыһа аатынан өрөспүүбүлүкэ таһымнаах «Голоса трех долин» куонкурус быйыл Бөтүҥҥэ буолара ситиһилиннэ.
Бүгүҥҥү күҥҥэ култуура эйгэтин көҕүлүүр, өйүүр Президент фондатын Граныгар кыайыылаах тахсан уонна олохтоох дьаһалта көрбүт харчытынан кулууппутугар аппаратура атыыласпыппыт, туттар оборудованиелары саҥардыбыппыт.
«Голоса трёх долин» куонкурус өрөспүүбүлүкэ араас муннуктарыттан ыллыыр талааннаахтары муспуппут. Ол курдук, куонкуруска профессионал ырыаһыттар уонна бэйэ айан толорооччулар диэн туһунан күрэхтэспиттэрэ. Дьүүллүүр сүбэҕэ СӨ норуотун артыыһа Емельянов Александр Георгиевич председателлээх СӨ норуотун арыыстара Дьяконова Анегина Николаевна, Заболоцкай Владимир Ильич, СӨ үтүөлээх артыыстара Неустроев Прокопий Дмитриевич, Павлов Владимир Прокопьевич үлэлээн сыаналаабыттара.
Ырыа куонкуруһа аҥаардас талааны эрэ көрдөрүүгэ олоҕурбакка, улуу артыыска сүгүрүйүү бэлиэтэ буолар. Ол курдук, күрэҕи таһынан, СӨ народнай артыыстара эдэр ырыаһыттарга маастар-кылаас көрдөрбүттэрэ, сүбэ-ама биэрбиттэрэ этиллэр.
Тэрээһин саамай үөрүүлээҕэ – кыайыылаахтары эҕэрдэлээһин уонна театр артыыстара кыттыылаах гала-кэнсиэр. «Айылгы» култуура киинин үөрүү, дьол эйгэтигэр классика уонна норуот айымньыларын истэн хайа көрөөччү дуоһуйуо суоҕай?!
«Голоса трех долин» куонкурус эрэ быһыытынан буолбакка, кини өрөспүүбүлүкэҕэ үтүө үгэстэри харыстааһыҥҥа уонна академическай ырыаны сайыннарыыга туһуланар.
Маннык куонкуруһу ыытар наадалаах, киһи эрэ барыта опера ырыаһыта буолбат. Истэргэ наһаа үчүгэй эбит. Истэ туран киһи турукка, сынньалаҥ эйгэтигэр киирэн хаалар эбит. Маны этэн туран, олус чаҕылхайдык да ыллыыр оҕолор бааллар эбит. Былаан быһыытынан, таһымнаах куонкуруһу 2-3 сыл арыттаах ыытар баҕа санаалаахпыт, былаанныыбыт.
Аны маастар-кылаас туһунан кылгастык, Александр Емельянов, Анегина Дьяконова курдук уопуттаах айар куттаахтар оҕолорго билиилэрин арыйдылар. Кинилэр сөпкө ыллааһын, сөпкө тыынааһын курдук эрчиллиилэри быһаарбыттарын, үөрэппиттэрин көрөн, киһи эрэ үөрэниэн, ыллыан баҕарар курдук.
Суорун Омоллоон аатынан опера уонна балет театрын кытта бииргэ үлэлэһэргэ кэпсэтиилэр ыытыллаллар. Холобура, быйыл опера уонна балет театрыгар буолар тэрээһиннэргэ спонсордарбытыгар, кыттааччылар салайааччыларыгар билиэттэри бэлэх быһыытынан туттардыбыт.
Биһиги тэрийээччилэргэ, бары кыттааччыларга, дьүүллүүр сүбэҕэ махтанабыт. Ол курдук, улуустааҕы култуура начальнигар Семен Ядрихинскайга, солбуйааччыга Александра Новгородоваҕа, тэрээһини кыайа-хото ыытарга Афанасий Шестаков аатынан улуустааҕы норуот айымньытын киинин үлэһиттэрэ күүстээх көмө оҥорбуттарын бэлиэтиибит. Ону тэҥэ, халтараан күннэргэ Дьокуускайтан, Намтан дьону аҕалбыт суоппарга Айылҕан Ильичка, аппаратурабытын көннөрүүгэ улахан көмөлөрүн иһин Николай Кривошапкиҥҥа, Николай Уваровка махтанабыт.
Бөтүҥ олохтоох дьаһалтатыгар, дьахтар сэбиэтигэр, Бөтүҥ орто оскуолатыгар, уһуйааҥҥа, ас-үөл тэрийиитигэр көмөлөспүттэргэ, көрөөччүлэргэ, бука барыларыгар барҕа махтал буоллун! Хас биирдии дипломант, лауреат анал ааты ылбыттар 2-10 тыһ. тиийэ суума харчыны спонсордаабыт бар дьоммутугар тыл бастыҥын аныыбыт!» – диир Михаил Алексеевич.
Куонкурус бары кыттааччылара харчынан наҕараадаламмыттара, оттон Гран-при хаһаайыттара 30 тыһ. солк. суумалаах сертификаттары туппуттара. Куонкуруһу тэрийээччилэр, көмөлөһөөччүлэр махтал суруктары ылбыттара.
Куонкурус түмүктэрэ:
Бэйэ толорооччулар:
3-с истиэпэннээх дипломант:
П.П. Ядрихинскай-Бэдьээлэ аатынан Намнааҕы «Олоҥхо» дьиэтэ, Павлов Руслан Александрович;
2-с истиэпэннээх дипломант: Граф Биэрэгиттэн Корякина Лидия Николаевна;
1-кы истиэпэннээх дипломант: Намнааҕы 1-кы нүөмэрдээх оскуола, Барабанов Святослав Дмитриевич;
3-с истиэпэннээх лауреат: Намнааҕы «Сахатранснефтегаз», Тюкянов Артем Николаевич;
2-с истиэпэннээх лауреат: Намнааҕы Оҕо искусствота, Федоров Ньургун Прокопьевич;
1-кы истиэпэннээх лауреат: Музыкальнай колледж, Харитонов Дьулурҕан Янович;
Гран-При хаһаайына: Төхтүрдээҕи Оҕо искусствота, Сметанина Надежда Иннокентьевна.
Профессионал толорооччуларга:
3-с истиэпэннээх дипломант: АГИКИ, Егорова Зулейха Геннадьевна;
2-с истиэпэннээх дипломант: Педагогическай колледж, Болдысов Никита Рустамович;
1-кы истиэпэннээх дипломант: Педагогическай колледж, Тараховский Василий Геннадьевич;
3-с истиэпэннээх лауреат: АГИКИ, Кириллова Мария Пахомовна;
2-с истиэпэннээх лауреат: АГИКИ, Слепцов Рустам Михайлович;
1-кы истиэпэннээх лауреат: АГИКИ, Николаева Нарыйа Николаевна;
Гран-При хаһаайына: АГИКИ, Винокурова Лия Анатольевна.
https://youtu.be/MBolUZoMz3g?si=QmfQ4VrGmAA_DHJn куонкуруһу бу сыылканан киирэн көрүөххэ сөп.