Россияҕа Уһуйааччы уонна Аҕа Сүбэһит сылынан Бөтүҥ нэһилиэгэр Учуутал күнэ үөрүүлээх быһыыга-майгыга ааста.
Тэрээһин Ефрем Степанович Сивцев – Таллан Бүрэ аатынан орто оскуола үлэһиттэрин уус-уран оҥоһугун уонна “Учуутал – олох тутаах киһитэ” кинигэ быыстапкатыттан саҕаланна. Быыстапкалары технология учуутала Наталья Васильева уонна олохтоох модельнай библиотека сэбиэдиссэйэ Валентина Колесова бэлэмнээн дьон-сэргэ сэҥээриитин ылла.
Бу күн нэһилиэк баһылыгын солбуйааччы Галина Маркова “Бөтүҥ нэһилиэгин сайдыытыгар кылаатын иһин” анал бэлиэни Нина Никитична Баишеваҕа уонна бочуотунай грамоталары, махтал суруктары үчүгэй үлэлээх оскуола үлэһиттэригэр, Сивцевтар, Прядезниковтар-Эверстовтар, Хохоловтар уонна Кугдановтар педагогическай династияларыгар эҕэрдэ суруктары туттарда. Оскуола директора Александр Дмитриев ветеран учууталлары, тутаах үлэһиттэри чиэстээтэ.
Үөрүүлээх тэрээһини Надежда Макарова салайааччылаах оҕолор ырыа ансаамбыллара, Сардаана Попова, Дьулурҕан Харитонов, Кыһыл Дэриэбинэ “Сайдыы” культура дьиэтин үлэһиттэрэ (дир.Айталина Винокурова) ылбаҕай ырыаларынан киэргэттилэр. Киэһэни Ирина Винокурова уонна Семен Стручков иилээн-саҕалаан ыыттылар.
Бэлиэ күҥҥэ оҕолор уонна төрөппүт комитетын (сал.Матрена Рожина) аатыттан сибэкки дьөрбөтүн бары педагогтарга, ветеран уччуталларга бэлэх уунан сүрэхтэрин үөртүлэр.
Бу курдук билиигэ-көрүүгэ, олох баалыгар сирдээччи күндү дьоммутугар үтүө тэрээһин үрдүк таһымнаахтык ааста.
