Саха биллиилээх бэйиэтэ, талааннаах тылбаасчыта, ССРС суруйааччыларын сойууһун чилиэнэ, Гражданскай сэрии кыттыылааҕа, Саха АССР култууратын үтүөлээх үлэһитэ, РСФСР үөрэҕириитин туйгуна Ефрем Степанович Сивцев-Таллан Бүрэ үбүлүөйдээх 115 сылын түмүктүүр тэрээһин олунньу 7 күнүгэр Нам улууһун Бөтүҥ нэһилиэгэр буолан ааста.
Тэрээһин бастакы чааһа – үс түһүмэхтээх уус-уран дьүһүйүү. Сыанаҕа бастаан кинигэни сэҥээрбэт мэник оҕо киирэр. Кини Таллан Бүрэ айымньыларын ааҕан, кэлин санаата уларыйар, элбэҕи билэр…
Бастакы айымньы – “Сулустар” поэма. Бэйиэт кэргэнигэр Марфа Николаевнаҕа анаабыта. Сэттэ сулус быыһынан дүҥүрдээх удаҕан киирэн кэлэн, кыырар курдук үҥкүүлээтэ. Бу көстүү Таллан Бүрэ удаҕан төрүттээҕин бэлиэтээтэ, кини куйаарынан эҥсэр айар талаанын ойуулаата.
Егор Софронов “Гейнеттэн” долгутуулаахтык ааҕан, Таллан Бүрэни тылбаасчыт быһыытынан билиһиннэрдэ.
Ырыанньык бэйиэт тылларыгар суруллубут “Мааппа ырыатын” Мирабэлла Шарина ылбаҕайдык ыллаата.
Иккис түһүмэх Аҕа дойду Улуу сэриитин тиэмэтигэр ананна.
“Хотойук” куруһуок оҕолоро, тыл дьайар күүһүнэн сэрии алдьархайын чугастык ылынан, көрөөччүнү уйадытар гына иэйиилээхтик ааҕан сөхтөрдүлэр.
Үһүс түһүмэххэ эйэлээх олох уруйданна. Зарина Яковлева “Манчаары ырыатын” толордо.
Оскуола эр дьоно “Төрөөбүт дойдум” хоһоонунан уус-уран дьүһүйүүнү түмүктээтилэр.
Тэрээһиммит иккис чааһыгар Нам улууһун баһылыгын солбуйааччы Ю.В. Дьяконов, үөрэх салалтатыттан Ю.П. Жергина, улуус бибилэтиэкэтиттэн Н.В. Павлова, Р.Н. Дьяконова, “Отуу уота” литературнай түмсүүттэн М.П. Мохначевская-Марта Мария, М.Н. Елисеева, итиэннэ Дьокуускайтан саха норуодунай суруйааччылара Наталья Харлампьева уонна Елена Слепцова-Куорсуннаах, режиссёр И.С. Новиков, ыраахтан-чугастан Таллан Бүрэ оҕолоро, сиэннэрэ, аймахтара кэлэн эҕэрдэлээтилэр, Таллан Бүрэни үйэтитиигэ ыытыллыбыт үлэни сырдаттылар.
“Таллан ааҕыылара” улуустааҕы научнай-практическай кэмпириэнсийэ түмүгүнэн бастыҥнары наҕараадалаатылар. I үрдэллээх Добун сурук – Архан Бочкарев, IX кылаас, Көбөкөн (сал. А.Н. Петрова). II миэстэ – Влада Габышева, XI кылаас, Нам 2-с №-дээх оскуолата (сал. Е.А. Попова). III миэстэ – Елизавета Бушуева, VIII кылаас, Хатыҥ Арыы (сал. М.Д. Новгородова).
Тэрээһин үһүс чааһыгар Таллан Бүрэ истипиэндьийэтин IX кылаас үөрэнээччитэ Вика Сивцеваҕа туттардылар. Вика үөрэҕэр уһулуччу, саха тылын олимпиадатын кыттыылааҕа, “Хотойук” куруһуок хоһоонньута, эгэлгэ күрэх кыайыылааҕа.
Ити курдук Таллан Бүрэҕэ анаммыт ырыа-хоһоон дьоро киэһэтэ киһини ураты турукка киллэрэр истиҥ-иһирэх эйгэни түстээтэ, үрдүк таһымҥа тэрилиннэ.