Иэйэбин
Ийэ тылбынан…
Тобулабын
Төрөөбүт тылбынан…
Саҥарабын
Сахам тылынан…
Өрүү бииргэ буолар
Өбүгэм тылынан…
Төрөөбүт тыл, сурук-бичик декадатын чэрчитинэн «Бөтүҥ нэһилиэгэ» МТ, С.П.Оконешников аатынан «Айылгы» КК уонна олохтоох модельнай библиотека тэрийиилэринэн нэһилиэккэ үгүс тэрээһиннэр ыытылла тураллар.
Ол курдук Ийэ тыл күнэ үөрүүлээх планеркаттан саҕаланна. Тэрилтэ үлэһиттэригэр “Бараахап дьыктаана”, оҕолорго “Таптыыр сахам тылынан” республиканскай акция, түөлбэлэр икки ардыларыгар “Этигэн тылым кэрэтэ” тыл оонньуута, хабылык, хаамыска күрэҕэ ыытылынна. Тыл оонньуутугар 1 миэстэни — “Бөтүҥ” (сал.Румянцева Н.М.), 2 миэстэни – “Сэргэлээх” (сал.Лукина А.Я.), 3 миэстэни – “Чараҥ” (сал.Васильева А.Н.) , хабылык, хаамыска күрэҕэр 1 миэстэни – “Сэргэлээх”, 2 миэстэни – “Чараҥ”, 3 миэстэни – “Бөтүҥ” түөлбэлэр ыллылар.
Олунньу 14 күнүгэр оҕолорго уран тыл күүһүнэн төрөөбүт дойдуга тапталы иитэр, дорҕоонноохтук, иэйиилээхтик ааҕар сатабылы үрдэтэр, уус-уран ааҕыы сайдыытын көҕүлүүр сыаллаах “Хоһоон хонуута” күрэх ыытылынна. Күрэххэ “Сардаана” уһуйаан оҕолоро кытыннылар. Түмүккэ 1 миэстэни – Сайаана Эверстова — Петр Тобуруокап “Тоҕо”, 2 миэстэни – Арсен Иванов — Калистрат Еремеев “Бөрө”, 3 миэстэни Дайаана Бочкарева — Татьяна Волгина “Ийэбэр бэлэх” хоһооннору ааҕан ыллылар.
Олунньу 17 күнүгэр “Түөлбэ тускула” проект чэрчитинэн уус-уран самодеятельность көрүү-күрэҕэ ыытыллыаҕа. Нэһилиэк олохтоохторо бу тэрээһиҥҥэ кыттаары бэлэмнэнэ сылдьаллар.
